މަހުޖަނުންނަށް ވިއްކަން ރާއްޖޭގައި 200 މިލިއަން ޑޮލަރު (3 ބިލިއަން ރުފިޔާ) ގެ ފްލޯޓިން އަލްޓްރާ ލަގްޒަރީ ވިލާތަކެއް ހެދުމަށް ރިސޯޓު ކޮންސްޓްރަކްޝަން ދާއިރާގެ ހޮޓެލްސް އެންޑް ރިސޯޓްސް އިންވެސްޓްމެންޓްސް (އެޗްއާރްއައިއެމް) އާއި ފިންލެންޑްގެ މޭޔާ ފްލޯޓިން ސޮލިއުޝަނުން ސޮއިކޮށްފި އެވެ.
ކުރުނބާ މޯލްޑިވްސްގައި މިއަދު ބޭއްވި ރަސްމިއްޔާތުގައި އެ ދެ ކުންފުނިން ވަނީ ކ.ވިލިވަރު ގައި 13 ލަގްޒަރީ ފްލޯޓިން ވިލާ އެޅުމުގެ މަޝްރޫއުގައި ރަސްމީކޮށް ސޮއިކޮށްފަ އެވެ.
މި ޕްރޮޖެކްޓްގެ ދަށުން އެންމެ ފުރަތަމަ އަޅާ 13 ވިލާ ވިއްކަން ހަމަޖެހިފައިވަނީ 20 މިލިއަން ޑޮލަރު (300 މިލިއަން ރުފިޔާ) އަށް ވުރެ މަތީ އަގުތަކެއްގަ އެވެ. ޖަނާ ވިދާޅުވީ، ވިލާތައް ވިއްކުމަށް ހާއްސަކޮށް، އެ ވިލާތައް ގަނެވޭ ފެންވަރުގެ ފަރާތްތަކަށް ހާއްސަ އިވެންޓެއް ބާއްވާނެ ކަމަށެވެ.
މޭޔާ ފްލޯޓިން ސޮލިއުޝަނަކީ ދުނިޔޭގައި ވެސް އެންމެ ފުޅާ ދާއިރާއެއްގައި ކްރޫޒްލައިނާ ބަންނަ ކުންފުންޏެވެ.
ކ. ވިލިވަރަކީ ކޮވިޑް ދުވަސްވަރު ކަރަންޓީނު ފެސިލިޓީއެއް ހެދި ރަށެކެވެ.
އެޗްއޭއާރްއައިއެމްގެ ޗެއާމަން މުހައްމަދު އަލީ ޖަނާހު ވިދާޅުވީ، ކ.ވިލިވަރުގައި އަޅަނީ އެންމެ ލަގްޒަރީ ވިލާތައް ކަމަށާއި އެކަމަށް ބޭނުންވާ ފައިނޭންސް ޔޫރަޕިއަން އިންވެސްޓްމެންޓް ބޭންކުން ހަމަޖެހިފައިވާ ކަމަށެވެ. އޭނާ ވިދާޅުވީ، މީގެ ކުރިން ރިސޯޓު ކޮންސްޓްރަކްޝަންގެ ބިޔަ މަސައްކަތްތައް ކުރި އިރު ވެސް، ރާއްޖެއަށް ތަފާތު ކޮންސެޕްޓުތައް ތައާރަފް ކުރަން ބޭނުންވި ކަމަށެވެ. އެހެންވެ، މޭޔާ އާ އެކު ވި އެއްބަސްވުމުގެ ދަށުން ރާއްޖެއަށް މުޅިން ތަފާތު ޓެކްނޮލޮޖީއެއް ތައާރަފް ކުރެވިގެންދާނެ ކަމަށެވެ.
އިމާރާތް ކުރުމުގެ އެންމެ ޒަމާނީ ޓެކްނޮލޮޖީގެ އެހީގައި މިއިން ވިލާއެއް ނިންމުމަށް ދޮޅު އަހަރު ވަރު ނަގާނެ އެވެ. މި ވިލާތައް 2024 ހިސާބަށް ނިންމާލެވޭނެ ކަމަށް އެޗްއޭއާރްއައިއެމް އިން ބުންޏެވެ.